يعني إيه على حسب الشغل
قالت وهي بتجمع هدومها
يعني لو المطعم خلص بدري بنام شوية قبل ما أجي هنا ولو اتأخر بنام لما أرجع البيت
سألتها
وبتروحي دار الرعاية إمتى
إيدها وقفت فجأة
بصتلي وقالت
إنت عرفت منين إن أمي في دار رعاية
سكت لحظة وأنا ببص للورقة اللي حطيتها على المكتب
بصت هي ناحية الورقة وشافت اسم أمها مطبوع فوق الفاتورة وملامحها اتغيرت
مدت إيدها بسرعة وخدتها وقالت
دي ورقتي يا بيه
قلت بهدوء
عارف
قالت بحدة ما كنتش متوقعها
يبقى ما كانش من حقك تقراها
رفعت عيني لها
إنت بتتكلمي معايا بالطريقة دي
بلعت ريقها لكنها ما رجعتش في كلامها
أنا مش قصدي أقل أدبي بس دي ورقة تخص أمي وأنا مش بحب حد يعرف ظروفنا
لأول مرة حسيت إني أنا اللي اتقفشت مش هي
قلت
المبلغ كبير عليكي
ردت
دي مش مشكلتك
قلت
ممكن تبقى مشكلتي
هزت راسها بسرعة
لا يا بيه أنا مش جاية أطلب منك فلوس ولا مساعدة أنا جاية أشتغل واللي آخده مقابل شغلي بس
سألتها
حتى لو أمك اتطردت من الدار
وشها شحب للحظة وبعدين شدت الورقة بين صوابعها
إنت ما تعرفش حاجة عن أمي
قلت
عشان كده بسألك
بصتلي فترة طويلة وكأنها بتحاول تفهم أنا عايز إيه منها وبعدها قالت
أمي ست تعبانة ومش بتقدر تتحرك لوحدها وأخويا مات من سنتين وأنا الوحيدة اللي فاضلة لها لو خرجت من الدار مش هعرف أوديها فين بس أنا هتصرف
قلت
إزاي
ردت وهي بتحاول تمنع صوتها من الارتجاف
مش عارفة بس هتصرف
كان في إصرار في صوتها خلاني أفتكر نفسي قبل الرصاصة لما كنت بقول نفس الجملة وأنا واقف وسط رجالي حتى لو الدنيا كلها اتقفلت في وشي هتصرف
قلت لها
روحي نامي في أوضتك ساعتين قبل ما تبدئي الشغل
هزت راسها
أنا خلصت يا بيه
قلت بحدة
مش طلبت رأيك روحي نامي
رفعت دقنها وقالت
أنا مش واحدة من رجالتك عشان تصدـ,,ـــر لي أوامر بالطريقة دي
الجملة خلتني أبص لها بصدمة
هي كانت بتكلمني كأنها مش عارفة أنا مين فعلاً أو كأنها عارفة ومش فارق معاها
قلت
إنت عارفة إن ممكن أمشيكي من القصر في ثانية
قالت
وعارفة إني لو مشيت من هنا هروح أدور على شغل تاني بس مش هسيب حد يكلمني كأني ما عنديش كرامة
وسابت السلة ومشيت ناحية الباب
للحظة كنت عايز أنادي الحرس ويمنعوها لكن صوتها فضل يتردد في دماغي
ما عنديش كرامة
أنا اللي قضيت سنتين بعامل كل اللي حواليا كأنهم عبيد عندي لأنني مش قادر أتحكم في جسمي لكن البنت دي كانت بتشتغل طول اليوم ولسه عندها قوة تحافظ بيها على كرامتها
ناديتها قبل ما تخرج
بسمة
وقفت من غير ما تلف
النقاش
التعليقات والردود (0)
سجّل الدخول للمشاركة في النقاش. تسجيل الدخول
لا توجد تعليقات بعد — كن أول من يشارك رأيه.